!اب کروں تو کروں میں کیا مُرشِد

!میں تو جیتے جی مر گیا مُرشِد

 

!یاں سے اسرار بارہا مُرشِد

!واں سے انکار ہی رہا مُرشِد

 

سب ہی آلام راکھ ہو جائیں

!پوچھ لیں گر وہ ”کیا ہوا؟“، مُرشِد

 

اِس جنوں میں یہ دشت بھی توبہ

!مجھ کو زنداں ہے لگ رہا مُرشِد

 

کیا نمازیں قبول ہیں میری؟

!یاد وہ اُن میں بھی رہا مُرشِد

 

کیوں یہ تفریق ہجر میں آئی؟

!میں بکھر، وہ نکھر گیا مُرشِد

 

!سنگ اُس کے رہا میں رشکِ فلک

!ذرّۂ ہیچ اب ہوا، مُرشِد

 

ہم نرے بے گِلہ ہیں رہزن سے

!ہم کو رہبر نے دھر لیا مُرشِد

 

جن کی منزل تھا میں کبھی، اُن کی

!رَہ کی دیوار بن گیا مُرشِد

 

وہ غفور و رحیم ہے تو پھر

کیا ہے دوزخ کا ماجرا مُرشِد؟

 

ایک شب خواب میں ملے تھے ہم

!اور وہ خواب ہی رہا مُرشِد

 

اِک ذرا نم ہوا سرِ مژگاں

!پھر غمِ ہجر ٹل گیا مُرشِد

 

میں نے پالا تھا جو کئی برسوں

!رات وہ خواب مر گیا مُرشِد

 

قسمت اپنی ہی یاں عدو ٹھہری

!جس کو چاہا نہیں ملا مُرشِد

 

شاعری، فقر، عشق اور وجداں

!مہرؔ پر رب کی ہیں عطا مُرشِد