درد ایسا ہے کہ لفظوں میں نہیں آ سکتا

کرب ایسا ہے کہ اشکوں میں نہیں آ سکتا

 

لطف جو اُن کے تغافل سے ملے درد کا ہے

وہ نمک سے اٹے زخموں میں نہیں آ سکتا

 

خوش کلامی سے میں کر سکتا ہوں جگ کو تسخیر

حیف! وہ بت مری باتوں میں نہیں آ سکتا

 

خوب ہے، آپ نہیں آ سکو ہو دل میں مرے

اور میں آپ کے قدموں میں نہیں آ سکتا

 

ہجرِ جاناں میں جو ہوتا ہے مری آہ میں سُر

عالمِ کُل کے وہ نغموں میں نہیں آ سکتا

 

گھیر لے تیرگیِ عشق جسے وہ کمبخت

جس قدر چاہے اُجالوں میں نہیں آ سکتا

 

مہرؔ عاشق ہے نئے دور کا، دیوانہ نہیں

مثلِ مجنوں یہ خرابوں میں نہیں آ سکتا